O le faiva o Maulolo Asiata Wairaki Toevai, o le lolomiina o tusi ma tala, ma le tusia o talafou i niusipepa. Sa amata i Samoa ma fa‘aauau i Niu Sila. I le 1970 na tu‘ua ai Samoa ae malaga i Aotearoa ma lona tausi ma lo lā alo e toatasi. Sa ia mua‘i galue i lea tausaga mo le falelomitusi o le Parker Printing i Niutone, i Aukilani. Sa galue foi mo le Auckland Star, e tu‘ufa‘atasia talafou ae le‘i lolomiina. A o galue mo le Auckland Star sa talosaga e Maua Faleautu ina ia galue mo le Mana ma le CARE. Sa fa‘ato‘ā 24 pe 25 ona tausaga ‘ae galue mo le Mana e faamaumau ma faasoa atu tala fou.
I tua atu o lenei faiva, e tele fa‘alāpotopotoga sa ia ‘auai ma tautua i ai. O se tasi o Samoa sa ‘auai i le Pātī o le Leipa, e fa‘amālosi i tagata Pasifika e palota ina ia taulia so latou leo. O se tasi fo‘i sa fesoasoani i tagata Samoa ina ia maua ni galuega ma malamalama i le totogiina o fale po‘o le fa‘atauina o se fale motu. Sa lotu i Newton PIC ma ia faia ni ala e fesootai ai le Mana ma faifeau o ekalesia o iai tagata Pasifika, ina ia malamalama tagata i le auaunaga a le Mana. O lo‘o pine i le sao o se tasi tamā faifeau iloga o le Ekalesia PIC, o Rev. Leuatea Siō. E le gata foi i lena, sa auai ma pu‘eina fo‘i le tele o ata i lea vaitau i fa‘atasiga o tagata Pasifika e pei o fa‘aulufalega o falesa, o umusaga o maota o faifeau faapea fo‘i ma le Umusaga o le Maota Samoa.
Na vāvālalata so‘otaga ma galulue fa‘atasi ma e o lo‘o faamauina talafou i Samoa. O fesootaiga lelei ma le lagolagosua ma si ona tauusoga o Gatoaitele Savea Sano Malifa, o le ulua‘i fa‘atonu o le Samoan Observer na vave maua talafou i mea na tutupu i le vā o mālō e lua.